Gramatiche fonetiche furlane

Cheste Gramatiche fonetiche furlane e vûl jessi un imprest pe formazion dai operadôrs linguistics e massime dai insegnants de lenghe furlane, dant une descrizion sute e schematiche dai fenomens principâi de fonetiche dal furlan di riferiment, cognossût ancje tant che furlan standard o coinè, e des varietâts dal sisteme linguistic furlan. Dutis chestis nozions no àn di jessi insegnadis par fuarce tai cors elementârs e intermedis de lenghe, ma ur coventin ai insegnants dai cors di cualsisei nivel, par podê vê un cuadri ordenât de lenghe e par podê rispuindi cun serenitât a dutis lis domandis dai arlêfs. Cun di plui ur coventin ai operadôrs de lenghe par lassâ indaûr lis inciertecis, soredut grafichis, che a puedin simpri jessi cuant che une norme e je avonde gnove. Cun cheste opare si cîr di dâ un repertori ordenât e sistematic dai fenomens fonetics, ma e je la cussience che a podaressin jessi mancjancis: si varà a grât ducj chei che a volaran dâ segnalazions e conseis par completâ o par mendâ lis edizions che a vignaran. Cheste gramatiche e je ordenade intun prin cjapitul su grafemis e fonemis, intun secont su la division in silabis, po dopo a son i doi cjapitui plui grues sui fenomens des vocâls e des semivocâls e su chei des consonantis.